2,3 млн теңге: Қазақстанда ең жоғары жалақыны қай мамандар сұрайды

Еңбек және халықты әлеуметтік қорғау министрлігі Қазақстанда ең жоғары жалақыны қай мамандар сұрайтынын және сұранысқа ие мамандар туралы мәліметтерді жариялады, деп хабарлайды KAZ.NUR.KZ.

Министрлік келтірген деректерге сүйенсек, 2025 жылдың мамыр айында Enbek.kz электрондық еңбек биржасында 86 мың бос жұмыс орны мен 110 мың түйіндеме орналастырылған. Өткен аймен салыстырғанда олардың саны сәйкесінше 11,8 пайыз және 4,3 пайызға азайған.

Кадрға ең жоғары қажеттілік дәстүрлі түрде білім беру (15 мыңнан астам бос жұмыс орны), қызмет көрсетудің басқа түрлері (10,7 мың) және құрылыс (8,5 мың) салаларында байқалған. Сұраныс негізінен – ірі қалалар мен агроөнеркәсіптік аймақтарда.

Сондай-ақ орташа білікті мамандар тапшылығы байқалған – сұраныс ұсыныстан 16 пайызға жоғары. Сонымен қатар жұмыс іздеушілер арасында жоғары білікті лауазымдар үшін бәсекелестік күшейген. Олардың саны жұмыс берушілердің ұсыныстарының санынан асып кеткен.

34 жасқа дейінгі жастар жұмыс іздеушілердің ең белсенді санаты болып қалған – олар барлық түйіндеменің 44 пайызын құрайды (110 мыңның 48,6 мыңы). Олардан кейін орта жастағы үміткерлер (37 пайыз). Ал барлық жұмыс іздеушінің 52,8 пайызын әйелдер, 47,2 пайызын ерлер құрайды.

Сұранысқа ие мамандықтардың ішінде тәртіп сақшыларына (1,8 мың бос орын), медбикелер (1,7 мың) мен жүргізушілерге (1,5 мың) сұраныс сақталып отыр.

Жалақы бойынша ең көп ұсыныс тау-кен өнеркәсібіндегі басшының орынбасары (орта есеппен 788 мың теңгеден), бас құрылысшы (662 мыңнан) және бұрғылаушы-инженер (605 мыңнан) лауазымдары арасында тіркелген.

Жұмыс іздеушілер арасында ең жоғары жалақы күтетін мамандар – ұшқыш (орта есеппен 2,3 млн теңгеден), IT жобаларды әзірлеу бөлімінің басшысы (1,2 млн теңге) және өндіруші саладағы учаске басшысы (1,1 млн теңге).

"Мамыр айында жұмыс берушілер тарапынан да, жұмыс іздеушілер тарапынан да белсенділіктің қалыпты төмендеуі байқалады. Жалпы жұмысшылар, жүргізушілер, күзетшілер және медицина қызметкерлері сұранысқа ие болып қала береді. Күтілетін жалақы деңгейі әдетте жасына қарай өседі, бұл кәсіби тәжірибе, біліктілік және мансаптық амбициялар арасындағы қатынасты көрсетеді", - делінген хабарламада.