Мәдениет министрі мемлекет қолдауына үміткер киножобалар қалай іріктелетінін түсіндірді

Мәдениет және ақпарат министрі Аида Балаева киноиндустрия өкілдеріне үндеу жасап, мемлекет қолдауына үміткер киножобаларға арналған конкурстың ережелерін түсіндірді, деп хабарлайды KAZ.NUR.KZ.

Министр Facebook желісіндегі парақшасында мемлекет қолдауына үміткер киножобаларға арналған конкурстық іріктеу ережелеріне бірқатар өзгеріс енгізілгенін жазды.

"Бұдан былай конкурс келесі тәртіппен өткізіледі:

• Алдын ала басым тақырыптар жарияланып, сценарий жазуға екі ай уақыт беріледі;
• Бірінші кезеңде тек сценарийлер мен сценарий жоспарлары қабылданды;
• Сараптама кеңесі жобаларды анимациялық, көркем және деректі кино бағыттары бойынша іріктейді;
• Екінші кезеңде толық құжаттар топтамасының сәйкестігі тексеріледі;
• Анықталған қателерді түзетуге үш күн уақыт беріледі.
• Ашық қорғау 9–12 маусым аралығында өтеді. Оның ашықтығын қамтамасыз ету мақсатында онлайн трансляция ұйымдастырылады", - дейді Аида Балаева.

Министрдің айтуынша, биыл питчингке 99 жоба жіберілген.

"Министр ретінде мен бұл процесті жеке бақылауыма алып отырмын. Сараптамалық кеңес мүшелері де ұлттық киноөнердің дамуына серпін беретін мазмұнды, сапалы жобаларды іріктеу үшін бар күшін салып жатыр. Біздің ортақ мақсатымыз – отандық киноның көкжиегін кеңейту.

Мемлекет қаржысы есебінен түсірілетін фильмдер – халықтың мәдени мұрасының бір бөлігі ретінде қабылданады. Сондықтан кинематографистер өз жұмысына жоғары жауапкершілікпен қарап, мазмұнды да сапалы туындылар ұсынуға ұмтылады деп сенемін", - дейді ол.