Сот Қуандық Бишімбаевтың алимент мөлшерін азайту туралы талап арызын қанағаттандырмады

Сот алимент мөлшерін азайту және алимент өндіру туралы келісімнің кейбір тармақтарын алып тастау туралы Қуандық Бишімбаевтың талабын қанағаттандырмады, деп хабарлайды Астана қалалық сотының баспасөз қызметіне сілтеме жасаған KAZ.NUR.KZ.

Қуандық Бишімбаев Астана қаласының кәмелетке толмағандардың істері жөніндегі мамандандырылған ауданаралық сотына алимент төлеу туралы нотариаттық келісімнің талаптарын өзгерту туралы азаматтық талаппен жүгінген.

Соттың баспасөз қызметінің мәліметінше, 2020 жылы бұрынғы ерлі-зайыпты арасында нотариаттық келісім жасалған, шарт бойынша әкесі кәмелетке толмаған үш баланы асырап-бағуға әр айдың 20-на дейін ай сайын 1,6 млн теңге мөлшерінде алимент төлеуге міндеттелген.

"Талап қоюшы алимент мөлшерін азайту арқылы аталған келісімді өзгертуді сұрады, оны бас бостандығынан айыру орындарында жазасын өтеп жатқандығымен және жұмысқа орналаспағанымен негіздеді.

Сондай-ақ талап қоюшы келісімнен бірнеше ережені алып тастауды сұрады.

Оның қатарында балаларды ақылы оқу орнында оқыту, олар кәмелетке толғаннан кейін қосымша шығыстарды төлеу, балаларды медициналық тексеруге және емдеуге байланысты шығындар, тұру, тамақтану, сақтандыру, көлік және басқа да ілеспе шығындарды қоса алғанда, Қазақстанда да, шетелде де балалардың демалысын жылына кемінде бір рет төлеу міндеттемелері бар", - делінген соттың баспасөзге арналған хабарламасында.

Алайда іс материалдарын қарағаннан кейін сот алимент төлеу туралы нотариаттық келісімге өзгерістер енгізу үшін заңды негіз жоқ деген қорытындыға келді.

Сот талап қоюшының 2024 жылдың тамызында сыйға тарту шарттары бойынша үшінші тұлғаларға өзіне тиесілі мүлікті иеліктен шығару арқылы өзінің материалдық жағдайын әдейі нашарлатқанын анықтады.

"Бұл ретте оның ұзақ мерзімге сотталғанын және келісімді көзделген көлемде орындауға мүмкіндігі жоқ екенін ескере отырып, өзіне тиесілі мүлік есебінен міндеттемелерді орындауға нақты мүмкіндігі болған. Бұл жағдайларды сот талап қоюшының жосықсыз әрекеті деп санайды", - дейді сот өкілдері.

Қолданыстағы заңнамаға сәйкес, ата-аналардың екеуі де балаларын күтіп-бағуға, тәрбиелеуге және дамытуға бірдей жауапты. Еңбекке қабілетті ата-аналар соттылығының немесе өзге де мән-жайлардың болуына қарамастан, көмекке мұқтаж кәмелетке толмаған балаларды асырауға міндетті.

Нәтижесінде сот балалардың құқықтары мен заңды мүдделерін ескере отырып, талапты қанағаттандырудан бас тартты.

Шешім заңды күшіне енген жоқ.