"Менің Қыз Жібегім" осындай болуы керек": Нұржамал Үсенбаева жазушы Ғабит Мүсіреповтен бата алған кезін еске алды (видео)

Белгілі опера әншісі Нұржамал Үсенбаева сахнаға алғаш қадам басқанда халық жазушысы, драматург, сыншы Ғабит Мүсіреповтен бата алған. Өміріндегі әсерлі сәт туралы әнші 1001 түн бағдарламасында айтып берді, деп хабарлайды KAZ.NUR.KZ.

"1001 түн" студиясында өнерлі жұп Төлеген Мұхамеджанов пен Нұржамал Үсенбаева қонақ болды.

Сұқбат барысында Нұржамал Үсенбаева халық жазушысы Ғабит Мүсіреповтен бата алған сәтін есіне алып, оны әлі күнге дейін өзінің бойтұмарындай көретін жеткізді.

"Менің сахнадағы алғашқы қадамым. "Абай" опера театрының 50 жылдығына орай қойылған "Қыз Жібек" операсына қатысып, Қыз Жібектің партиясын орындадым. Студент кезім, Алматыда консерваторияда оқимын. Сол сәтте басыма бақ құсы қонған шығар, бірнеше әншінің ішінен мені таңдады.

Мен үшін ең қымбат сәт – залда көрермендер қатарында ұлы Ғабит Мүсіреповтің өзі отырды. Спектакль аяқталған соң, сахнаға шығып бәрімізді құттықтады, мені де құттықтап, маңдайымнан сүйіп, "менің Қыз Жібегім" осындай болуы керек" деп керемет сөздер айтты. Мен оны бата ретінде қабылдадым. Әлі күнге дейін жүрегімде, әрқашан күш-қуат береді", - дейді әнші.

Айта кетейік, Ғабит Мүсірепов "Қыз Жібек" либретторасының авторы. "Қыз Жібек" – опералық шығармасы алғаш рет 1934 жылы қазіргі Абай атындағы опера және балет театрында қойылды.

Қазақ халқының әйгілі лиро-эпостық жыры профессионалды операға ғана емес, көркем фильмге де негіз болды.

1971 жылы Ғабит Мүсіреповтің сценарийі бойынша Сұлтан Қожықов "Қыз Жібек" фильмін түсірді.