"Біздің дәуіріміз өтті ме": әнші Бауыржан Исаев 4 адамға концерт берген кезін айтты (видео)

"Хабар" арнасында "КешRec" бағдарламасында қонақ болған танымал әнші Бауыржан Исаев небәрі 4 адамға концерт берген күндерін еске алды, деп жазады KAZ.NUR.KZ.

Бағдарлама жүргізушісі сұқбат барысында әншінің 9 адамға концерт берген кезін еске салды. Әншінің айтуынша, бұл 2015 жылы болған.

"Бұл – күлетін жағдай емес. Ол кезде кәсіби сахнада жүргеніме 19 жыл болған еді. Жалпы, зал толмаса әсіресе, 7-8 адам келсе бұл өнер адамы үшін – өте ауыр. Бірақ соған қарамастан, 1,5 сағат концерт бердік. Өнер саласында жүргеннен кейін, концерттің жарнамасын жасағаннан кейін оны өткізу керек, бұл біздің міндетіміз", - деген әнші Алматы облысындағы концертіне небәрі 4 адам келгенін айтты.

"Соның өзінде 1 сағат 15 минут концерт бердік. Тағы екі-үш ауданда болған концертке 15-20 адамнан келді. Осыдан кейін "Біздің дәуіріміз өтті ме?" әлде "Біздің әндеріміз халқымызға керек болмай қалды ма?" деген ойлар келді. Негізі бұл – көп әншіде бар мәселе", - дейді ол.

Бауыржан Исаевтың сөзінше, көп әнші аудан орталықтарына, үлкен қалаларға барады, жарнама жасайды, билеттерін кассаға қалдырады, бірақ халық концертке келе бермейді. Кейде Қазақстанның халық әртісінің концертіне халық келмей жатқанын еститінін жасырмады.

"Халық кейде "мына әнші жоқ болып кетті, ол кісілер қайда жүр екен" деп іздеп жатады. Алайда аудан, ауылдарға барғанның өзінде концертке келмейді. Анда-санда 1-2 жылда өнерді қоятын шығармын деген ой да келеді. Бірақ әлі нақты шешіге келген жоқпын. Биыл кәсіби сахнада жүргеніме – 29 жыл. Келесі жылы шығармашылығама 30 жыл толуына орай мерекелік концерт өткізу керек. Содан кейін ойланатын шығармын", - деді әнші.