"Халық тік тұрып, қошеметтеді": Досымжан Таңатаров концертінде пәтер кілті табысталған Нұрғали Нүсіпжанов туралы айтты

Күні кеше 50 жасқа келіп, мерейтойлыық концертін берген Досымжан Таңатаров Jibek Joly арнасындағы "Бүгін.Live" бағдарламасына сұқбат беріп, концертіне неліктен Нұрғали Нүсіпжановты шақырғанын түсіндірді. Бұл әнші, Қазақстанның Еңбек сіңірген қайраткері Таңатаровтың соңғы 10 жылда берген концерті, деп жазады KAZ.NUR.KZ.

"Иә, бір есеп беру, өзіме есеп беру, өзімді құрметтеген еліме есеп беру. Барлығы бір байланысып келе жатқан дүние. Сахнаның төрінде жүргенімізге 30 жылдың көлемі болған екен. Соның барлығын бір жинақтап, етек-жеңімізді жинап, жинаған әндерімізді, айтылған әндеріміздің жеткені халыққа, жетпегені бар, соның ішіндегі негізгі көңілімнен шыққан әндердің басын қосып, бір кеш берейік деген ой. Өзі бір жыл сайын емес, мен өзі бір есептеп қарасам, 10 жыл сайын бір есеп береді екенмін, ұзақ дайындалады екенмін", - деді ол.

Концертті неліктен жиі қоймайсыз деген сұраққа әнші былай жауап берді:

"Сағынысып көріскеннен асқан нәрсе жоқ қой. Адам күніне бір адамды көре бергеннен кейін ол адамның кемшілігі көрініп тұрады... Дайындалып келу керек. Әйтпесе, менде Аллаға шүкір, репертуарым жыл сайын толығып тұрады, айтылып тұрады. Мен дәуренім жүріп тұрған уақытта да сағындырып беретінмін. Бұл – Астанадағы төртінші концертім. Бас-аяғы жинақталған кеш болды", - деді ол.

Әнші өзінің ұстазы Нұрғали Нүсіпжановқа қатысты да сұрақтарға жауап берді:

"Нұрғали Нүсіпжанов ағамызды арнайы алып келдік. Биыл сахнада жүргеніне 70 жыл болады. Енді 90-ды алқымдаған кісі. Сондай артында мұра. Жай ғана жеткен жоқ. 90-ға анандай мұрамен, бүткіл қазақ энциклопедиясын әнмен толтырған, ұлылардың алдынан өткен асылдың сынығы ғой. Идеологияға қарай болыстым. Біз де ертең сол жасқа келеміз. Бізді де інілер қадірлесін, құрметтесін. Осындай мақсатпен ағамды шақырдым. Құдайға шүкір, басқа замандастарым, іні-қарындастарымыз өнердегі, қаншама адамдар болды. Бірақ ана кісі келгені, жай сахнаның кіргеннің өзіне, халық орнынан тік тұрып шапалақ ұрды", - деді ол.

Өнер иесі ауылдарды аралап концерт қоюға қатысты да сұраққа жауап берді:

"Мен осыған дейін Тұрсынбек Қабатов екеуміз 70-тен аса концерт бердік. Бүткіл Қазақстанның қаласын, облыс орталықтарын, қолымыз жеткен аудан, сонан кейін 4 мемлекет көршілес жатқан Ресей, Қырғызстан, Өзбекстан және Моңғолия жерлеріне концертімізді бітіріп, екі жарым ай концерт бердік", - деді ол.

Айта кетейік, әнші Досымжан Таңатаровтың концертінде Нұрғали Нүсіпжановқа пәтер кілті табысталған еді.