Үндістанда әйел атасының арқасында 60 килограмм артық салмақтан арылды

Салмағы 130 килограмға жеткен Үндістан тұрғыны атасымен бірге күнделікті серуенге шығып, қанттан толықтай бас тартқанының арқасында 60 килограмм салмақ тастай алды. Бұл туралы The Times of India басылымына сілтеме жасаған KAZ.NUR.KZ хабарлайды.

Симран Пуния бала кезінен артық салмақпен күресіп келеді. Мектеп қабырғасында оны семіздігі мен тері ауруына шалдыққаны үшін мазақ еткендер аз болмаған. Күйзеліске түскен Симран жасөспірім кезінен темекіге әуестеніп, үйінен шығудан қалған.

Алайда 2020 жылы Балиге сапарға аттанған ол, тіпті баспалдақпен көтерілуге шамасы жетпейтінін, сыртта ұзақ серуендеудің өзі арман болып қалғанын түсініп, өзгеруге бел буады. Ең алдымен ол толықтай қант пен темекіден бас тартады. Артынша атасымен бірге күнде сыртқа серуендеп шығуды әдетке айналдырады. Осылайша, ол көмекке зәру атасын күнделікті таза ауаға шығарып қана қоймай, өз денсаулығын да ретке келтіре бастайды.

Бастапқыда Симран 700 метр жолды әзер еңсеретін. Десе де уақыт өте келе артық салмағынан құтыла бастаған әйел күш жинап, кардио-жаттығулар жасай алатын деңгейге жетеді. Әйел желі парақшасын ашып, онда жетістіктерін ортаға салып отырады. Ол парақшасына жазылушылардың қолдау сөздері де жетістікке жетуіне зор көмек болғанын жасырмайды.

Симран артық салмақтан арылу оған бастапқыда оңайға соқпағанын мойындап отыр. Ол қатаң диетаның орнына салауатты өмір салтын ұстануды, тұрақты серуендеуді әдетке айналдырғаны жақсы нәтиже бергеніне дән риза.