Астанадағы автобус апаты: 8 жасар қыз екі аяғынан айырылды

Астанада қоғамдық көлікпен болған жол апатынан кейін 8 жасар қыздың аяғын кесуге тура келді. Дәрігерлер қанша тырысқанымен, басқалай мүмкін болмапты, деп хабарлайды "КТК" арнасы.

Одан басқа тағы 6 бала мен 9 ересек адам түрлі дәрежеде жарақат алған. Жолаушыға толы қоғамдық көлік қаланың негізгі көшелерінің бірі — Республика даңғылында жол апатына түскен.

Автобус шамамен сағатына 30 шақырым жылдамдықпен жүріп келе жатып бағанға соғылған. Сол кезде жүргізуші мызғып кетті ме, әлде денсаулығында қиындық туындады ма, ол жағы әзірге белгісіз. Апат түнгі ондар шамасында, жолаушы көп кезде болды. Зардап шеккендердің көп болғаны да содан.

"Отырғаннан кейін бір 5-10 минут өткен жоқ, апатқа ұшырадым. Өзім негізі телефонда отырғанмын, байқамай қалдым, шыны керек, күтпеген жағдай болды. Қатты тарс еткен дыбыс шықты. Мен басымды қатты соғып алдым. Бірден автобуста жарық сөніп қалды, түтін шыға бастады. Адамдар айқайлап, жылап, шыңғыра бастады", - дейді тұрғын Мөлдір Жақан.

Оқиға орнына жедел жәрдем бригадалары бірден жеткен. Барлығы 15 адамды қаладағы стационарларға жеткізіпті. Олардың үшеуі ауруханаға жатқызылып, қалғаны алғашқы медициналық көмектен кейін үйіне жіберілген. Ал ауыр жараланған 8 жастағы қыздың аяғын кесуге тура келді.

"Зардап шеккендердің арасында бір науқастың жағдайы ауыр, екіншісі өте ауыр жағдайда. Біреуіне аяғынан төмен ампутация жасалды. 2017 жылғы кішкентай қыз. Бүкіл медициналық көмек толық көрсетіліп жатыр", - дейді Астана қоғамдық денсаулық сақтау басқармасының баспасөз хатшысы Айгерім Ардақ.

Автобус тізгінінде 37 жастағы жүргізуші отырыпты. Еңбек өтілі 15 жылдан асқан. Сол күні жоспарлы медициналық тексеруден де өткен. Жол апатына қатысты абайсызда адамға ауыр жарақат келтіруге әкеп соққаны үшін қылмыстық іс қозғалған. Астана полиция басқармасы оқиғаның мән-жайын анықтау үшін тергеу жүргізіп жатыр.

Дереккөз: "КТК" арнасы