АҚШ-та ұшақ тұрғын үйлерге құлады: қаза тапқандар бар, жарылыстан үйлер зақымданды

АҚШ-тың Филадельфия қаласында бортында алты адамы бар медициналық ұшақ сауда орталығының маңында апатқа ұшырады. Жарылыстан үйлер мен көліктерге залал келді, деп хабарлайды KAZ.NUR.KZ.

АҚШ-тың жаңадан тағайындалған көлік министрі Шон Даффи X әлеуметтік желіcіндегі парақшасында Learjet 55 ұшағы Солтүстік-Шығыс Филадельфия әуежайынан көтерілгеннен кейін апатқа ұшырағанын хабарлады. Бортта алты адам болған.

The New York Times мәліметіне сәйкес, ұшақ сауда орталығының маңында құлаған - ұшақ құлаған жерде алапат өрт шығып, көліктер мен үйлерді шарпыған.

Ұшаққа иелік ететін Jet Rescue жедел жәрдем қызметі апат кезінде бортта төрт экипаж мүшесі, сондай-ақ бір бала мен оған жауапты бір адам болғанын мәлімдеді.

"Тірі қалғандар туралы бізде ешқандай ақпарат жоқ, ал жалынның қарқынына, қирандылар мен апат түріне қарап, аман қалғандар барына күмәніміз бар", - деді басылымға Jet Rescue Air Ambulance жедел жәрдем қызметінің өкілі Шай Голд.

Жаңалықтар арналары мен X әлеуметтік желі қолданушылары оқиға орнынан фотолар мен видеоларды жариялап жатыр.