Астанадағы автобус апаты: зардап шеккен қыз баланың отбасына қандай көмек көрсетіледі

Астана әкімдігі автобус апатынан зардап шеккен қыз баланың отбасына қандай көмек көрсетілетінін мәлімдеді. Бұл туралы елордалыққа әкімдікке сілтеме жасаған KAZ.NUR.KZ хбарлайды.

Әкімдіктің мәліметінше, Астана қаласында болған жол-көлік оқиғасы кезінде зардап шеккен баланың отбасына алғашқы күннен бастап жан-жақты көмек көрсетіліп жатыр.

Әкімдік пен автобус паркінің өкілдері баланың ата-анасымен және туыстарымен кездескен.

Қолдау көрсету бойынша мынадай шаралар белгіленген:

• автобус паркі сақтандыру полисі есебінен 19,6 миллион теңге көлемінде сақтандыру төлемі (қазіргі уақытта заң аясында тиісті рәсімдер жүргізілуде);
• қосымша автобус паркі тарапынан 10 миллион теңге көлемінде демеушілік көмек көрсету туралы шешім қабылданған;
• отбасы Ақмола облысынан болғандықтан, емделу және оңалу кезеңінде уақытша баспана жалдау бойынша көмек ұсынылған;
• медициналық және психологиялық көмек көрсетіліп жатыр;
• әлеуметтік қолдау мәселелері бойынша сүйемелдеу қамтамасыз етіліп жатыр.

Әкімдік өкілдерінің хабарлауынша, қазіргі уақытта баланың жағдайы тұрақты, бейінді бөлімшеге ауыстырылған. Оның туыстарына қабылданған және ұсынылған шаралар туралы толық ақпарат берілген.

"Қала әкімдігі алғашқы күннен бастап зардап шеккендерге қажетті көмек көрсетіп келеді. Бұл шаралар отбасыға жанашырлық пен шынайы қолдау көрсету мақсатында қолға алынды. Біздің өкілдеріміз отбасымен тұрақты байланыста болып, зардап шеккен қыз баланың сауығып, жан-жақты қолдау алуын қамтамасыз ету үшін бар күшін салып жатыр.

Сонымен қатар ауруханада жатқан екі науқасқа да жан-жақты көмек көрсетіліп жатыр. Олар да сақтандыру төлемін алады", - делінген хабарламада.

Естеріңізге сала кетейік, 2 маусымда Астанада жолаушылар автобусы бағанаға соғылып, салдарынан 10 шақты адамның зардап шеккенін, оның бірі ауыр халде екенін жазған едік.

Кейін Қоғамдық денсаулық сақтау басқармасы ауруханаға 15 адамның жеткізілгенін, бір адамның аяғына ампутациясы жасалғанын мәлім етті. Кейінірек ауыр жараланған 8 жасар қыз бала екені белгілі болды.