Атыраудағы мектеп ауласында 7 жасар қыздың саусағы жұлынып кетті

Атыраудағы ойын алаңдарының бірінде 7 жасар қыздың саусағы жұлынып кетті. Мектеп ауласында ойнап жүріп, денсаулығына зақым келген оқушымен қазір психологтар жұмыс істеп жатыр, деп хабарлайды Almaty.tv.

Оқыс оқиға мектеп оқушылары спортпен шұғылдану үшін аулаға шыққанда болған. Дене шынықтыру сабағы кезінде балалар қоршалмаған, әрі әбден ескірген алаңда ойнапты. Ал 7 жасар қыздың ата-анасы "бірден жедел жәрдем келсе, жағдай осынша ушықпас еді" дейді.

"Қызым тренажердағы құрылғыға қолын қысты. Екі саусағын ауыртқан. Бір қолының саусағы жоқ. Екіншісінің саусағы терісіне ілініп тұрды. Дәрігерлер тігуге келмейтінін айтты. Мына жерде не табличка жоқ, не қоршау жоқ. Соқалар тұр, міне құлайын деп", – деді қала тұрғыны Нұргүл Тәкенова.

Полиция аталған оқиғаға қатысты қылмыстық іс қозғаған. Аталған дерек "Кәмелетке толмағандардың өмірі мен денсаулығын қамтамасыз ету жөніндегі міндеттерді тиісінше орындамау" бабы бойынша тергеледі.

Телеарна тілшісінің мәліметіне сәйкес, қаладағы ойын алаңдарының жартысына жуығы әбден тозған, әткеншектерге жыл сайын ақша бөлінгенімен, қауіпсіздік талабы ескерілмейтін көрінеді.

"Не алынбады, не қоршалмады. Бұл – бірінші оқиға емес, бұған дейін де 1-2 рет қайталанған. Қоршалу керек. Неге десеңіз, баланы таңертең сабаққа жібергенде сап-сау жібердік. Түсте осындай хабар келді. Алаңдар қоршалуы керек", – деді қала тұрғыны абзал Хаудин.

Мәлім болғандай, жыл соңына дейін Атырауда 100-ден аса ойын алаңы мен спорттық жаттығу орны орнатылады. Оған жергілікті бюджеттен 700 миллион теңге бөлінген. Бірақ қауіпсіздікті қамтамасыз ету – жобада қарастырылмапты. Әкімдіктегілер осылай дейді.

"Жоба бойынша ешқандай ойын орындары немесе спорт алаңдары қоршалмайды. Спорт жаттығу алаңдары 2019 жылы қалалық құрылыс бөлімінің тапсырысы бойынша орнатылды. Салынған спорт, ойын алаңдарын айта аламын", – деді Атырау қаласы әкімінің баспасөз хатшысы Ғасырбек Төлеген.

Қала әкімдігі аталған мәселе жаңа ойын алаңдары ашылғанда ғана шешіледі дейді. Қолданыстағы ескілері де жаңартылмақ. Әзірге жоспардың қашан жүзеге асары белгісіз.

Автор: Жұлдыз Қайратқызы, Атыраудан